Քայլ 1. Ներգրավեք մասնակիցների

Ինչպես ներկա գործընթացների քարտեզագրման պարագայում, այս դեպքում ևս առաջարկում ենք աշխատանքներն իրականացնել ինտերակտիվ եղանակով: Բարելավված գործընթացի քարտեզագրման աշխատանքներում կարող եք ներգրավել նաև ծրագրային ապահովման մատակարարներին, որպեսզի նրանք տեղեկացված լինեն՝ ինչպիսին է լինելու գործընթացը:

Քայլ 2. Սահմանեք գործընթացի սկիզբն ու ավարտը

Այս քայլում ևս պետք է կրկնել նույն գործողությունները, որոնք իրականացվում են ներկա գործընթացները քարտեզագրելիս․ աշխատանքները սկսեք գործընթացի ամբողջական շրջանակը սահմանելուց, այսինքն՝ նախանշեք նրա սկիզբը, ավարտը և գործընթացի այն բոլոր մասերը, որոնք դուք կարևորում եք:

Քայլ 3. Քարտեզագրեք նոր գործընթացի քայլերը

Այս քայլը կարող է բարդ լինել, քանի որ հաճախ ստիպված կլինեք պատկերացնել, թե ինչպիսին է  լինելու բարելավված գործընթացը: Դրա համար որպես հիմք ընդունեք ներկա գործընթացի քարտեզը, սահմանեք հիմնական քայլերը, այնուհետև շարունակեք քարտեզագրումը հետևյալ ուղղություններով՝

  • ներկա գործընթացում բացահայտված խնդիրների լուծում,
  • գործընթացի իրականացման համար պահանջվող ժամանակի նվազեցում,
  • օգտատիրոջ փորձառության առցանց կամ անցանց հատվածների բարելավում:

Այսպես, եթե պարզել եք, որ՝

  • գործընթացի 2 քայլերի միջև սպասման ժամանակը շատ մեծ է, գուցե նպատակահարմար գտնեք հնարավորության դեպքում միավորել այդ քայլերը և ապահովել դրանց իրականացումը մեկ թիմի կողմից կամ մեկ գործառույթի շրջանակում,
  • դիմումների մեծ մասը ներկայացվում է սխալներով, դիտարկեք դիմումի ստուգման ընթացքը բարելավելու կամ օգտատերերի հետ նախատիպի փորձարկումների իրականացման հնարավորությունը՝ օգնելով նրանց ավելի ճշգրտորեն լրացնել տեղեկատվությունը,
  • թիմերը օգտատերերից հավաքում են տվյալներ, որոնք արդեն իսկ հասանելի են (օրինակ՝ բիզնես ռեգիստրում), դիտարկեք տեխնիկական բարելավումների կատարման հնարավորությունը, որոնց շնորհիվ տվյալներն անվտանգ կերպով անմիջապես կվերբեռնվեն բիզնես ռեգիստրից,
  • գործընթացում առկա է հատված, որը պահանջվում է ոլորտը կարգավորող օրենսդրությամբ, սակայն կիրառական չէ, ապա մտածեք իրավական բարեփոխումներ առաջարկելու ուղղությամբ։

Քայլ 4. Արդյունքով կիսվեք թիմի անդամների հետ

Գործընթացի քարտեզագրումից հետո ստացված արդյունքներով կիսվեք թիմի անդամների հետ՝ հետադարձ կարծիք և մեկնաբանություններ ստանալու համար։ Հաշվի առեք, որ խնդիրները հեշտությամբ չեն լուծվում, ուստի կարևոր է հիշել, որ բարելավված գործընթացների քարտեզագրումը մշտական աշխատանք է:

Քարտեզագրման ուղղությամբ կատարված աշխատանքը օգտագործվելու է ծառայության նախագծեր կամ նախատիպեր ստեղծելու նպատակով: Սակայն հետագայում օգտատերերի հետ փորձարկումների արդյունքում կարող է բացահայտվել, որ նախատիպը չափազանց բարդ է կիրառման համար: Կարող են լինել նաև իրավական սահմանափակումներ, որոնք հնարավոր չէ փոփոխել:

Հետևաբար կարևոր է հիշել, որ գործընթացի քարտեզագրումը պետք է պարբերաբար վերանայվի ծառայության պատասխանատուի, ծրագրային ապահովման մատակարարի և աջակցող թիմերի կողմից՝ անընդհատ կատարելագործվելով և հարմարեցվելով օգտատերերի կարիքներին։


Ինչպե՞ս քարտեզագրել ներկա բիզնես-գործընթացները